«Eu non repetiría o pacto pero recomendaría ao partido que si»
josé luis vergara Rey
O rexedor cedeirés aínda non confirma se volverá a ser candidato; pero se o fai, alega que buscará a forma de «mellorar resultados» e gobernar «sen hipotecas»
Como biólogo que é de formación, a José Luis Vergara (Cedeira, 1956) pérdenlle conceptos como «humanización», «accesibilidade», «saneamento»... ao falar da vila na que hai xa máis de tres anos se fixo coa alcaldía para o PSOE. Agora asiste ao debate interno sobre si será o seguinte candidato ou non co alento de que «hai persoas extraordinarias no partido, e algunhas incluso máis válidas que eu».
-¿Logo repetirá ou non como alcalde?
-Estou disposto, se o partido o ten a ben, a rematar o traballo iniciado hai catro anos. Pero se hai alguén que asuma substituírme, estarei encantado de axudarlle en todo.
-¿Cal é o seu prognóstico para as vindeiras municipais?
A obra estrela de Vergara é a rehabilitación do casco antigo Autor de la imagen: | JOSÉ PARDO
-Se a situación de antes non se da e finalmente son eu o candidato, intentarei mellorar os resultados das anteriores eleccións. Penso que o meu proxecto está suficientemente explicitado para que a xente o valore. Saben que o que prometo o cumpro e que non me treme a man.
-A súa investidura foi posible debido a un pacto tripartito co BNG e con Terra Galega, pero o tripartito non foi sinxelo. ¿Repetiría o acordo?
-Nas mesmas circunstancias e si os resultados se pareceran aos das pasadas municipais, recomendaría ao partido que repetise o pacto, pero José Luis Vergara non o repetiría. Penso que hai responsabilidades que, ou ben o pobo as deposita en min ou non repetirei.
-Semella desgastado...
-Síntome con moral para levar a cabo todos os proxectos que temos enriba da mesa, pero non de levalos adiante con hipotecas.
-¿Que proxectos son eses? ¿Cales son as tarefas pendentes en Cedeira?
-Hai un aspecto máis alá das obras, que ten que ver co respecto á legalidade, tanto en disciplina urbanística como de tráfico... Queremos unhas pautas de comportamento máis nórdicas. E cambiaría moitas obras xa realizadas por iso. Fáltanos favorecer o asociacionismo; ter unha sociedade consciente, participativa, dinámica. Pero a xente tamén necesita que lle falemos de obras, traballos de tanta enxundia como as que agora temos feito.
-¿A que obras se refire? ¿Cal foi o proxecto estrela do seu mandato?
-A máis paradigmática quizais sexa a rehabilitación do casco antigo, porque abrangue aspectos de estética, de separación de augas fecais e pluviais, e incluso a instalación de redes de fibra óptica. Este barrio ten 110 vivendas sen habitar, e o seguinte paso é o de transformalo nunha Área de Rehabilitación Integral que será un revulsivo económico para que a xente mellore as súas casas e así poidamos ver de novo xente nova polas súas rúas.
-Tamén está a recente incorporación de Cedeira á Mancomunidade.
-A nosa entrada na Mancomunidade foi moi aplaudida polos concellos e constata que Cedeira é moi querida no entorno de Ferrol.
-¿E en canto á idea de compartir servizos?
-Nós xa temos dous servizos externalizados polos gobernos anteriores que son a auga e o lixo. Son contratos feitos por unha eternidade e iso átame de pés e mans. Cedeira vai pagar nos próximos 15 anos uns seis millóns de euros en recollida de lixo.
Link: www.lavozdegalicia.es
