Cedeira-O alcalde pide á Xunta a mellora nos accesos viarios do municipio
redacción > ferrol
A delegada territorial da Xunta na Coruña, Belén do Campo, mantivo onte o seu primeiro encontro institucional co alcalde de Cedeira, Leopoldo Rubido, para tratar dos proxectos que desenvolve o Goberno galego no municipio. O rexedor aproveitou a reunión para trasladar á representante autonómica diversas demandas relacionadas co acondicionamento das infraestruturas viarias e a mellora das comunicacións na vila.
Segundo se informou dende a Xunta, Do Campo comprometeuse a estudar estas reivindicacións e "traballar intensamente para atendelas no menor prazo de tempo posible". En particular, salientouse o arranxo de dous tramos de acceso á estrada AC-566, ó seu paso polo termo municipal.
Emprego > En materia de emprego, dende a Xunta lembrouse que o Concello de Cedeira conta este ano cunha subvención de preto de 130.000 euros, destinados á contratación de 14 persoas desempregadas que se adiquen a obras e servizos de interese social. Do total, ata 12 contratos son a xornada completa.
Ditas axudas encádranse dentro dos fondos achegados pola Consellería de Traballo aos municipios a través do Plan de Cooperación. Este ano, subliñan, incrementouse a partida para Cedeira en máis de 32.500 euros con respecto ao ano 2010.
O encontro forma parte da ronda de contactos que a delegada provincial está a manter cos diferentes Concellos dende que asumiu o seu cargo.
Link. www.diariodeferrol.com
